آنا دیلیم
اسماعیل جمیلی
ناخیش ناخیش اینجه ایپک بئشیگینده
کئچمیشیمی قوناقلایان
دویغولارین دنیزینده
اینجی دیرلر کروانین آغیرلایان
دنیالاری دنیاسیندا سیغیشدیران
آنا دیلیم
دونه دونه وقتسیز سولان چیچکلری
تاریخ بویو نیسگیل اولان دیلکلری
یاشام اوچون هپ چرپینان اوره کلری
گوی قورشاغی قانادیندا اوچوشدوران
تورپاق یاشدا سایالارین گؤزگوسونده
مین ایللرین ایزلرینی
گونوموزله باریشدیران
آنا دیلیم
اؤز ائوینده چاغریلمامیش قوناق اولان
اؤز ائلینین دوداغیندا
اؤز یوردوندا یاساق اولان
شیرین دیللی وفاسیزلار دوزاغیندا
قولو باغلی دوستاق اولان
دیلیم دیلیم پارچالانان
سپه له نن
قارانلیغین سینه سینی یاران
سولماز اولدوز اولان
درین ظلمت گئجه لری
وورغونلارین حسرت دولو گؤزلرینده
آیدینلیغا اومودلانان
آنالارین سئوگی یایان نفسیله
لایلا لاردا یلماز اولان
بئشیکلرده گوللو چیچکلی یاز اولان
گاه ساز اولان گاه سؤز اولان
آنا دیلیم
دار گؤز یابان قوللوقچولار
کین کدورت مزاریندا
کیملیکلرین سومسوننده
قوجا شرقه حوکوم سورن
آدیم سانیم تاپداناندا
اوتانمازلار یوخلوغومو کوی سالاندا
وارلیغیمین کئشیگینده اویاق اولان
اؤز ائلینه داغلار کیمی دایاق اولان
اویانیشا چراغ اولان
دایانیشا بایراق اولان
آنا دیلیم آنادیلیم
اسماعیل جمیلی
سئوگیلی لر گونو
سئوگیلی لر گونونده یم سئوگیلیمدن اوزاقلاردا
آیریلیغین الینده یم سئوینجلریم دوزاقلاردا
نه سن وارسان نه ده آنام نه گول واردیر نه ده چیچک
یوللا اوزون عومور قیسسا آیریلیغا دؤزمور اوره ک
بوردا اسمیر پنجره مدن ساوالانین ایلیق یئلی
بوردا آلمیر درد غمی گؤزلرینین سئوگی سئلی
خاطره لر دفتری دیر دولاندیغین یئر لر منسیز
آیریلیغین غزلیدیر سنسیز منسیز قالان تبریز
وقتسیز خزان اسدی بیزه گؤروش یئری تالان اولدو
ایستگیمیز یاد اللرده دوستاق اولدو قالان اولدو
سئوگیلیلر آیری دوشدو وصال چاغین هجران آلدی
ایلک باهارا اومودلانان باغ باغچانی خزان آلدی
آرزی دولو اؤره گیمیز اولدو یئنه غم چناغی
توی گؤزله ین آنامیزین گولمز اولدو گول دوداغی
سئوه نلری آیری سالان یارامازا قارقیش اولسون
آیریلیغا باش ایمه ین سئوه نلره آلقیش اولسون
اسماعیل جمیلی
