Wednesday, September 15, 2021
HomeUncategorizedبالاجا قارا باليق

بالاجا قارا باليق

Author

Date

Category


صمد بئهرنگي
بالاجا قارا باليق
چئويرن: گونتاي گنجالپ


بالاجا قارا باليق
چيله گئجه سي ايدي. قوجا باليق دنيزين ديبينده اون ايکي مين نوه- نتيجه سيني
اطرافينا ييغيب ناغيل دئييردي :
“بيري وار ايدي، بيري يوخ ايدي. بير بالاجا قارا باليق وار ايدي. بو قاراجا باليق آناسي ايله
برابر کيچيک بير آرخدا ياشاييردي. آرخين سويو سال قايالاردان چيخيب دره نين
درينليگينه آخيردي .
بالاجا قارا باليغين و آناسي نين ائوجيگي خزه لرين آلتيندا بير قارا داشين آرخاسيندا
يئرلشميشدي. گئجه لر آنا- بالا بير يئرده خزه لرين آلتيندا ياتيرديلار. قاراجا قارا باليق آيي
ائولري نين ايچينده گؤرمک ايسته ييردي. آنجاق بو آرزوسونا چاتا بيلميردي. بالاجا قارا
باليق آيي ائولري نين ايچينده گؤرمه حصرتي ايله يانيب- ياخيليردي. آنا- بالا سحردن
آخشاما قدر بير- بيري نين آرخاسينجا دولانير و بعضن ده باشقا باليقلارا قاتيليب کيچيک
بير يئرده گزيشيرديلر .
بالاجا قارا باليق آناسي نين بيريجيک ائولادي ايدي. چونکو اون مين توخومدان يالنيز
بالاجا قارا باليق ساغلام دونيايا گلميشدي .
بير نئچه گون ايدي بالاجا قارا باليق دالغين، فيکيرلي گؤرونور، چوخ آز دانيشيردي.
مئيلسيزجه او يان بو يانا گئدير، چوخ واختلار دا آناسيندان گئري قاليردي .
آنا فيکيرلشيردي: ” بالاسي نين نه سه بير خسته ليگي وار کي، تئزليکله کچر گدر”.
سن دئمه بالاجا قارا باليغين دردي باشقا ايميش! بير گون سحر تزدن بالاجا قارا باليق
آناسيني يوخودان اوياديب دئدي: ” آنا، سنينله بير نئچه کلمه دانيشماق ايسته ييرم”.
آناسي يوخولو- يوخولو دئدي: “آي بالا، دانيشماغا واخت تاپميسان! سؤزونو ساخلا سونرايا.
ايندي گزييه چيخماق زامانيدير”.
بالاجا قارا باليق دئدي: ” يوخ آنا، من آرتيق بو گزييه قاتيلا بيلميه جه يم. من بوردان
گئتمه لييم”.
آنا دئدي: ” موطلق گئتمه ليسن؟ ”
بالاجا قارا باليق دئدي: ” هه، آنا جان، موطلق گئتمه لييم”.
آنا دئدي: ” سحر تئزدن هارا گئتمک ايسته ييرسن؟ ”
بالاجا قارا باليق دئدي: “ايسته ييرم گئديب بو آرخين سونونو تاپام. بيليرسنمي آنا
جان، آيلاردير فيکيرلشيرم کي، بو آرخين سونو هارادير، آنجاق هله هئچ بير شئي آنلايا
بيلمه ميشم. کئچن گئجه دن بو آنادک گؤزلريمه يوخو گيرمه ييب، بوتون گئجه بويو
فيکيرلشميشم. سونوندا کسين قرارا گلديم کي، يولا دوشوب گئديب بو آرخين سونونو
تاپمالييام. بيلمک ايسته ييرم باشقا يئرلرده نه لر وار”.
آنا گولومسه يرک دئدي: “من ده اوشاق ايکن بئله خياللارا چوخ دالميشديم. آنجاق
بالا، آرخين باشلانغيجي سونو اولماز. ائله گؤردويون کيمي آرخ هر زامان آخار. آخار و
هئچ يئره ده چاتماز”.
بالاجا قارا باليق دئدي: ” آنا جان، دونيادا هر شئيين سونو يوخدور مو؟ گئجه نين
سونو وار، گوندوزون سونو وار؛ هفته، آي، ايل..”.
آنا اونون سؤزلريني کسرَک دئدي: “آغزينا سيغمايان بو سؤزلري قوي بير يانا، قالخ
گئدک گزييه. گزمک واختيدير”.

www.durna.eu 6
بالاجا قارا باليق قطعي بير سسله دئدي: ” يوخ آنا، من آرتيق بو گزيلردن بئزميشم.
من گئتمک ايسته ييرم. يقين فيکيرلشه جکسن بو سؤزلري منه کيمسه اؤيرتميش. ائله
دئييل آنا جان، من چوخداندير بو فيکيرده يم. آنجاق باشقالاريندان دا چوخ شئيلر
اؤيرنميشم. مثلن گؤرموشم کي، بير چوخ باليقلار ياشلانديقدان سونرا گيلئيله نيرلر کي
عؤمورلريني معناسيز کئچيرميش، چوروموشلر. بيلمک ايسته ييرم کي، دوغرودان مي
ياشاييش ائله داريسقال بير موحيطده چابالاييب ياشلانماقدير، يوخسا باشقا نؤوع ده
ياشاماق مومکوندور؟”
بالاجا قارا باليغين سؤزلري بيتديکدن سونرا آناسي دئدي: “آي بالا، عاغليني مي
ايتيرميسن؟ دونيا…دونيا! دونيا نه دئمکدير؟ دونيا بيزيم ياشاديغيميز يئر و حيات دا ائله
بوندان عيبارتدير”.
بو آندا يئکه بير باليق اونلارين ائوينه طرف ياخينلاشاراق دئدي: “قونشو، نه
اولوبدور؟ اوشاغينلا دالاشيرسان دئيه سن. سانکي بو گون گزييه چيخماق فيکرينيز
يوخدو”!
بالاجا قارا باليغين آناسي قونشونون سسيني ائشيدر-ائشيتمز ديشارييا چيخيب دئدي:
“آي قونشو، گؤر نه پيس زامان اولموش! اوشاقلار آنالارينا نه سه اؤيرتمک ايسته
ييرلر”!
قونشو دئدي: ” نه اولوب کي؟ ”
آنا دئدي: ” بونا بير باخ سن، بير هوللوک بويو ايله گؤر هارالارا گئتمک ايسته يير!
ائله هئي دئيير گئديب دونياني گزمک ايسته ييرم، بئله ده ايش اولار؟”
قونشو دئدي: ” بالا، سؤيله گؤروم سن نه زاماندان بري عاليم و فيلوسوف اولموسان
کي، بيزيم خبريميز اولمايب؟ ”
بالاجا قارا باليق دئدي: ” خانيم، من بيلميرم سيز عاليم و فيلوسوف نه يه دئييرسينيز.
من سادجه بو گزينتيلردن بئزميشم و بو بئزيکديريجي ياشاييشا سون وئرمک ايسته ييرم.
ايستميرم نه زامانسا بير دفعه آييليب گؤرم کي، سيزين کيمي ياشلانميش بير باليغا
دؤنموشم و دونيا حاققيندا دا هئچ بير آنلاييشيم يوخدور”.
قونشو دئدي: ” واي واي! نه قورخونج سؤزلر”.
آنا دئدي: ” هئچ عاغليما گلمزدي کي، منيم بو بيريجيک ياوروم بئله اولاجاقميش.
گؤره سن هانسي خبيث بالامي يولدان چيخارميش”.
بالاجا قارا باليق دئدي: ” کيمسه مني يولدان چيخارماييب. منيم عاغليم وار درک
ائديرم و گؤزلريم وار گؤرورم”.
قونشو، بالاجا قارا باليغين آناسينا دئدي: ” آي باجي، او حلزونو خاطيرلاييرسانمي؟ ”
آنا دئدي: ” هه، ياخشي خاطيرلاييرام، ياخشي دئدين. بالاملا چوخ صؤحبتلشيب
پيچيلداشيردي. تانري اونون باشينا مين بلا گتيرسين، ياورومو او، يولدان چيخاريب”.
بالاجا قارا باليق دئدي: ” يئتر آنا جان! او منيم دوستوم ايدي”.
آنا دئدي: ” باليقلا حلزونون دوستلوغونو هئچ دويماميشديق”.
بالاجا قارا باليق دئدي: “من ده باليقلا حلزونون دوشمنليگيني هئچ دويماميشديم. آنجاق
سيز او يازيق حلزونا چوخ پيس داوراندينيز”.
قونشو دئدي: ” بو آرتيق کئچميشين صؤحبتيدير”.
بالاجا قارا باليق دئدي: ” سيز اؤزونوز کئچميشدن سؤز آچدينيز”.

www.durna.eu 7
آنا دئدي: “اصلينده اونو اؤلدورمه لي ايديک. خاطيرلاييرسانمي اوردا- بوردا نلر
دانيشيردي؟ ”
بالاجا قارا باليق دئدي: “او زامان مني ده اؤلدورون، چونکو من ده عئيني فيکيرلري
سؤيله ييرم”.
نه باشينيزي آغريديم، سس- کويه باشقا باليقلار دا ييغيشيب گلديلر. بالاجا قارا باليغين
سؤزلري هر کسي سينيرلنديرميشدي .
ياشلي باليقلاردان بيري دئدي: ” ائله بيليرسن سنه رحم ائده جه ييک؟”
باشقاسي دئدي: “سادجه اونا بير قولاق بورماسي وئرمه لي ييک”.
بالاجا قارا باليغين آناسي دئدي: “چکيلين کنارا، بالاما توخونمايين”.
باليقلارين ايچيندن بيري دئدي: “خانيم، ائولاديني لازيمينجا تربييه ائتمه ميسن، ايندي
ده جزاسيني چکيرسن”.
قونشو دئدي: ” اينانين، سيزينله قونشو اولماغيما اوتانيرام”.
باشقا باليق دئدي: “ايش بؤيومه ميش گلين بونون باشينا حلزونون باشينا
گتيرديگيميزي گتيرک”.
باليقلار بالاجا قارا باليغا هوجوم ائدرکن، بالاجا قارا باليغين آرخاداشلاري اونو
احاطه لرينه آليب اورادان اوزاقلاشديرديلار .
بالاجا قارا باليغين آناسي آغلايا-آغلايا باشينا دؤيوب دئييردي: “آي آمان… باشيما
هارانين کولون تؤکوم، بالام الدن گئدير”…
بالاجا قارا باليق دئدي: ” آنا، منيم حاليما آغلاما، بو ياشلانميش، عؤمورلريني
ايتيرميش بدبخت باليقلارين حالينا آغلا”!
باليقلاردان بيريسي اوزاقدان باغيردي: ” بيزي تحقير ائله مه آخماق”.
ايکينجيسي دئدي: “اگر گئديب پئشمان اولوب گئري دؤنسن، آرتيق سني ايچريميزه
بوراخماياجاغيق”.
اوچونجوسو دئدي: ” بوتون بونلار گنجليک دئوري نين هوسلريدير، گئتمه”!
دؤردونجوسو دئدي”: سؤيله گؤرک بورانين نه يي پيسدير، نييه گئديرسن؟ ”
بئشينجيسي دئدي: “باشقا بير دونيا يوخدور، دونيا يالنيز اولدوغوموز يئردن
عيبارتدير. شئيطانين داشيني تؤک اتگيندن، گئتمه”!
آلتينجيسي دئدي: ” بيز سني گؤرمه يه عادت ائتميشيک، سنسيز داريخاريق.”..
آنا دئدي: ” منه يازيغين گلسين، گئتمه… گئتمه”!
بالاجا قارا باليق آرتيق بو سؤيلننلرين هئچ بيريسيني دينله ميردي. تاي- توش
دوستلاريندان بير نئچه سي اونو يولا سالماق اوچون بالاجا قارا باليقلا چاغلايانا )شلاله
يه( قدر گلديلر .
بالاجا قارا باليق دوستلاريندان آيريلارکن دئدي: “آرخاداشلار، گؤروشمک اومودو
ايله سيزدن آيريليرام. مني اونوتمايين”!
دوستلار دئديلر: ” بالاجا قارا باليق، سني هئچ اونوتماق اولارمي؟ سن بيزي جهالت
يوخوسوندان اوياتدين. بيزيم عاغليميزا گلمه ين شئيلري سن بيزه اؤيرتدين. گؤروشمک
اوزره قورخماز و بيلگين دوست”.
بالاجا قارا باليق چاغلاياندان آشاغي آتيلدي. بول سولو بير بورولغانا دوشدو. اؤنجه
اؤزونو ايتيردي، سونرا ايسه باشلادي اطرافي گزمه يه. او آنادک بير يئره بيريکميش بو
قدر سويو گؤرمه ميشدي. مينلرجه چؤمچه باليق سودا او يان بو يانا قاچيشيرديلار. بالاجا

www.durna.eu 8
قارا باليغي گؤرجک اونا سؤز آتيب، مسخره ائتمه يه باشلاديلار: ” صور- صيفتينه باخ!
بو دا نه بيچيم ياراتيقدير)مخلوقدور(؟ ”
بالاجا قارا باليق اونلارين داورانيشلارينا ياخشيجا ديققت ائده رک دئدي: “لوطفا مني
تحقير ائتمه يين! منيم آديم بالاجا قارا باليقدير. سيز ده آدينيزي سؤيله سه نيز تانيش
اولاريق”.
چؤمچه باليقلاردان بيري دئدي: “بيز بير- بيريميزي چؤمچه باليق دئيه چاغيريريق”.
ايکينجيسي دئدي: “بيزيم اصل- نجابتيميز چوخ اولودور. بيز نجابتلي بير سويدانيق”.
اوچونجوسو دئدي: ” بيزدن داها گؤزه لي دونيادا تاپيلماز”.
بالاجا قارا باليق دئدي: “سيزين اؤزونوزو بو قدر به يه نميش اولمانيزي هئچ عاغليما
گتيرمزديم. آنجاق اولسون، من سيزي باغيشلاييرام. چونکو بوتون سؤيله ديکلرينيز
جهالتينيز و بيلگيسيزليگينيز اوزوندندير”.
چؤمچه باليقلار قيشقيرديلار: “يعني بيز جاهيليک؟”!
بالاجا قارا باليق دئدي: “جاهيل اولماسايدينيز بيلردينيز دونيادا سيزدن فرقلي
چوخلاري وار کي، گؤرکملري اؤزلري اوچون چوخ دا سئويمليدير. سيزين آدينيز دا حتّی
اؤزونوزون دئييل”.
چؤمچه باليقلار چوخ سينيرلنديلر، آنجاق گؤردولر کي، بالاجا قارا باليق دؤغرو
سؤيله يير، يئرسيز دوشمنچيليکدن ال چکيب دئديلر: “سن اؤزونو نه حاق اورا- بورا
چيرپيرسان. بيز سحردن آخشاما قدر دونياني گزيريک، آنجاق اؤزوموزدن، آتا-آناميزدان
باشقا کيمسه ني گؤرموروک. بير ده کيچيجيک سورونگن قوردلاري گؤروروک کي،
اونلاري دا سايماريق”.
بالاجا قارا باليق دئدي: “سيز کي، بو باتاقليقدان ديشارييا چيخميرسينيز، دونياني نئجه
گزه بيلرسينيز؟”
چؤمچه باليقلار دئديلر: “يوخسا بو باتاقليقدان باشقا آيري بير دونيا دا وار؟”!
بالاجا قارا باليق دئدي: “ان آزي فيکيرلشمه ليسينيز کي، بو سو هاردان بورايا گلير و
سودان کناردا نه لر اولا بيلر”.
چؤمچه باليقلار دئديلر: “سويون کنارينداکي دونيا نه دئمکدير، هارادير؟ بيز کي،
سويون کنارينداکي دونياني هئچ واخت گؤرمه ميشيک. هاهاها…هاهاها. سنين باشين
خاراب اولموش”.
بالاجا قارا باليق دا چؤمچه باليقلارين گولونج حرکتلرينه گولومسه دي. فيکيرلشدي
کي، بونلار دوزله سي دئييل، بونلاري ترک ائديب يولچولوغا داوام ائتمک لازيمدير.
آنجاق بيردن عاغلينا گلدي کي، بلکه چؤمچه باليقلارين آنالاري ايله ده بير نئچه کلمه
دانيشسين .اونلارا دئدي: “ياخشي، آنانيز هاردادي؟ ”
بو زامان قورباغانين زيل سسي بالاجا قارا باليغي ديکسينديردي. قورباغا باتاقليغين
قيراغيندا بير داشين اوستونده اوتورموشدو. اؤزونو سويا آتاراق بالاجا قارا باليغا
ياخينلاشيب دئدي: ” من بوردايام. بويوروغونوزمو وار؟ ”
بالاجا قارا باليق دئدي: “سالام يئکه خانيم”!
قورباغا دئدي: “آي سويو- سوپو )اصل- نسبی( بيلينمز اولان ياراتيق، عاغلي کسمز
ائولادلاريما فضيلتدنمي دانيشيرسان؟ من او قدر عؤمور سورموشم کي، بو باتاقليقدان
باشقا بير دونيانين اولماديغيني گؤرموش، دويموش، آنلاميشام. ياخشيسي بودور اؤز
ايشينله مشغول اول، منيم ائولادلاريمي يولدان چيخارما”.

www.durna.eu 9
بالاجا قارا باليق دئدي: ” يوز دفعه بئله عؤمور سورسن ده يئنه جاهيل، دوشونجه
سيز قورباغادان باشقا بير شئي اولماياجاقسان”.
قورباغا سينيرله نيب بالاجا قارا باليغين اوزَرينه آتيلدي. بالاجا قارا باليق جَلد حرکت
ائديب، ايلديريم سورعتي ايله اوراني ترک ائدرکن، زيغ- زيميريغي لاخلاديب باتاقليقداکي
يوخويا دالميش کيچيجيک سورونگن قورتلارين دا يوخوسونو قاچيردي .
زيروه لي داغلارين آياغينا دولاشان دره نين سويو چوخالميشدي. زيروه دن دره يه
باخارکن آرخ نازيک بير آغ ايپليک کيمي گؤرونوردو. داغدان قوپوب دره يه
يووارلانميش بؤيوک بير قايا سويو ايکي حيصه يه بؤلموشدو. ال بويدا بير قيزبوغان
*
قايانين اوستونده اوزانيب گونشين ايستيسيندن لذت آلير، بير آز کناردا بير قورباغاني
يئمکله مشغول اولان قيرخآياغا
** باخيردي. قورباغاني يئين قيرخآياغي گؤرجک بالاجا
قارا باليغين ايچينده بير قورخو حيسسي اوياندي. اوزاقدان قيرخآياغا سالام سؤيله دي.
قيرخآياق اَيري-اَيري بالاجا قارا باليغا باخاراق دئدي: ” نه ادبلي باليقدير! بري گل گؤروم
باليقجيق، گل، بري گل”.
بالاجا قارا باليق دئدي: “من دونياني گزمه يه گئديرم و جنابينيزين يئمي اولماق
ايستميرم”.
قيرخآياق دئدي: ” سن نييه بو قدر اينامسيز و قورخاقسان باليقجيق؟ ”
بالاجا قارا باليق دئدي: ” من نه اينامسيزام، نه ده قورخاق. سادجه گؤزومون
گؤردويونو و عاغليمين قاوراديغيني سؤيله ييرم”.
قيرخآياق دئدي: “ياخشي، سؤيله گؤرک گؤزون نه گؤردو و عاغلين نه دوشوندو
کي، سن ائله بيلدين من سني اوولاياجاغام”.
بالاجا قارا باليق دئدي: ” اؤزونوزو بيلمزلييه وورمايين”.
قيرخآياق دئدي: ” قورباغانيمي دئييرسن؟ اشي… گئرچکدن ده سن لاپ اوشاق
کيميسن. من قورباغالاري سئوميرم، هئچ سئوميرم. او اوزدن ده اونلاري گؤرجک
اوولاييرام. بيليرسنمي، قورباغالار ائله بيليرلر دونيانين بيريجيک موتلو جانليلاري
اونلاردير. من ايسه اونلارا دونيانين گئرچک حاکيمي نين کيم اولدوغونو ايثبات ائتمک
ايسته ييرم. اونا گؤره ده سن قورخما، بري گل، گل..”.
قيرخآياق بو سؤزلري دئييب ييرغالانا- ييرغالانا بالاجا قارا باليغا طرف يئريدي. او
قدر گولونج يئريشي وار ايدي کي، بالاجا قارا باليق گوله رک سؤيله دي: “آي يازيق، سن
هله يئريشيني بئله بيلميرسن، دونيايا کيمين حاکيم اولوغونو هاردان بيله جکسن؟ ”
بالاجا قارا باليق قيرخآياقدان اوزاقلاشيردي. سويون اوزَرينه بير کؤلگه دوشدو.
سرت بير ووروش قيرخآياغي قومسالليغا باسيب يوخ ائتدي. بالاجا قارا باليق گولمه سيني
زورلا جيلوولادي. بو زامان گؤردو کي، آرخين قيراغيندا کيچيک بير چوبان اوغلان
دوروب اونلارا باخيرميش. بير سورو قويون آرخا ياخينلاشيب سو ايچمه يه باشلادي.
قويونلارين مه لشمه لري دره ني باشينا آلميشدي. دره قويونلارين سسي ايله دولموشدو.
قويون سوروسو سو ايچيب اوردان اوزاقلاشديقدان سونرا، بالاجا قارا باليق قيزبوغاني
سسله ييب سؤيله دي: “حؤرمتلي قيزبوغان منيم آديم بالاجا قارا باليقدير. بو آرخين
موغان لهجه سينده مارمولکه
قيزبوغان دئييرلر. *
موغان لهجه سينده خرچنگه قيرخآياق دئييرلر. **

www.durna.eu 10
سونونو تاپماقدا قرارلييام. سانيرام سيز عاغيللي و بيلگين بير جانليسينيز. لوطفا منيم بير
سوروما جاواب وئرين”.
قيزبوغان دئدي: ” بويور، نه ايسته ييرسن سور”.
بالاجا قارا باليق دئدي: ” گلرکن يولدا مني باليق اودان قوشدان و ناققا باليقدان چوخ
قورخوزوردولار. اگر بو حاقدا بيلگينيز وارسا اسيرگه مه يين، منه سؤيله يين”.
قيزبوغان دئدي: ” ناققا بو طرفلرده اولماز. او، ان چوخ دنيزده ياشايير. آنجاق باليق
اودان قوش بو ياخينلاردا اولماليدير. آييق اول کي، آلدانيب اونون کيسه سينه دوشمه يه
سن.”
بالاجا قارا باليق دئدي: ” کيسه؟! کيسه ندير؟ ”
قيزبوغان دئدي: ” باليق اودان قوشون بوغازي نين آلتيندا بير کيسه وار. بو کيسه
چوخ سو توتار. باليق اودان سودا اوزَرکن بعضي باليقلار بيلمه دن دوشرلر اونون
بوغازي نين آلتينداکي کيسه يه. باليق اودان آج اولماسا باليقلاري کيسه ده ساخلار،
آجيخديغيندا يئيَر”.
بالاجا قارا باليق دئدي: “اونون کيسه سينه دوشدوکدن سونرا قورتولماق مومکون
دئييلمي؟ ”
قيزبوغان دئدي: “يالنيز بير قورتولوش يولو وار، کيسه ني ييرتيب قاچماق. من سنه
بير قيلينج وئرجه يم. باليق اودانا راست گلسن بو قيلينج سنه يارديمچي اولاجاق”.
قيزبوغان داشين جيريغينا گيريب الينده بير قيلينج قاييتدي. بالاجا قارا باليق قيلينجي
آليب دئدي: “سئويملي قيزبوغان سيز چوخ مئهريبانسينيز. بيلميرم سيزه نئجه تشککور
ائديم”.
قيزبوغان دئدي: ” تشککوره گرک يوخ. منيم چوخ قيلينجيم وار. ايشيم اولماديغيندا
اوتوروب بيتکيلرين تيکانلاريندان قيلينج دوزلديرم و سنين کيمي بيلگين، قورخماز
باليقلارا هدييه وئريرم”.
بالاجا قارا باليق دئدي: “مندن اؤنجه ده دنيز آختاريشيندا اولان باليقلار بوردان
کئچيبلر مي؟ ”
قيزبوغان دئدي: “چوووخ، چوخلاري بوردان گليب کئچيبلر. آرتيق اونلار بؤيوک
دسته يه چئوريلميش باليقچيلاري بئزديرميشلر”.
بالاجا قارا باليق دئدي: ” باغيشلايين، سؤز سؤزو گتيرير. اونلارين باليقچيلاري
نئجه بئزديرمه لري حاقدا مومکونسه بير آز گئنيش بيلگي وئرين”.
قيزبوغان دئدي: ” اونلار او قدر چوخالميشلار کي، باليقچيلار باليق توتماق اوچون
دنيزه تور آتاندا تورو دارتيب باليقچيلارين اللريندن چيخاريب و دنيزين ديبينه آپاريرلر”.
قيزبوغان قولاغيني داشين ده ليگينه سؤيکه ييب ديققتله قولاق آسماغا باشلادي.
سونرا دا بالاجا قارا باليغا دئدي: “من آرتيق گئتمه لييم. چوجوقلاريم يوخودان
اويانميشلار. سنه اوغورلار ديله ييرم”.
قيزبوغان داشين ده ليگينه گيرديکدن سونرا بالاجا قارا باليق يولونا داوام ائتدي. يولا
دوشدوکدن سونرا يوزلرجه جاوابسيز سواللار بئينيني سارميشدي. اؤز-اؤزونه
سوروشوردو: “دوغرودانمي آرخ دنيزه تؤکولور، يوخسا منيم اويدورمامدير؟ باليق اودان
قوشون گوجو منه چاتارمي؟ آنجاق من کي اونا هئچ پيسليک ائتمه ميشم، بيزيم کي
آراميزدا هئچ بير دوشمنليک يوخدور، ندن مني يئمک ايسته سين؟ “

www.durna.eu 11
بالاجا قارا باليق فيکيرلره، خياللارا دالغينجاسينا گئديردي. يولچولوغونون هر
آشاماسيندا يئنيليکلرله راستلانير، يئني شئيلر اؤيره نيردي. هوندور چاغلايانلارين )شلاله
لرين( باشيندان دونبالاق آشاراق دره يه توللانماقدان لذت آليردي. گونشين ايستيسي
آرخاسيني ايسيديردي. بالاجا قارا باليق ياشامينداکي بوتون بو اولايلاردان ذؤوق آليردي.
بير جئيرانا راستلاندي. جئيران تلسه- تلسه سو ايچيردي. بالاجا قارا باليق سئوينه رک
دئدي: ” گؤزل جئيران، نييه بئله تله سيرسن؟ ”
جئيران دئدي: ” اووچو آرخامجادير. بالديريما بير باخ. گوالله ديميش”.
بالاجا قارا باليق گوالله ياراسيني گؤره بيلمه دي، آنجاق جئيرانين آخساياراق
قاچماسيندان آنلادي کي، دوغرو سؤيله يير .
بير يئرده باغالارين قيزمار گونشين آلتيندا مورگولمه لريني گؤردو. باشقا بير يئرده
ايسه ککليکلرين هوسله، سئوگي ايله ماهني سؤيله مه لرينه تانيق )شاهيد( اولدو. داغلاري
بوروموش چيچکلرين قوخوسو هاوادا دالغالاناراق سويا قاريشيردي .
گون اورتادان سونرا دره نين ائله بير يئرينه چاتدي کي، آرخ بير اورمانين
اورتاسيندان کئچيردي. سو او قدر چوخالميشدي کي، بالاجا قارا باليق گئرچکدن ده بو قدر
بول سويون ايچينده اولماقدان لذت آليردي. بير آز داها گئتديکدن سونرا بير سورو باليغا
راستلاندي. آناسيندان آيريلديغي گوندن باليق گؤرمه ميشدي. بير نئچه کيچيک باليق قاراجا
باليغا ياخينلاشاراق دئديلر: ” سانکي قريبسن، دئييلمي؟ ”
بالاجا قارا باليق دئدي: ” هه غريبم. اوزاقدان، چوووخ اوزاقلاردان گليرم”.
کيچيک باليقلار سوردولار: ” هارا گئتمک ايسته ييرسن؟ ”
بالاجا قارا باليق دئدي: ” آرخين سونونو تاپماغا گئديرم”.
کيچيک باليقلار دئديلر: ” هانسي آرخين؟ ”
بالاجا قارا باليق دئدي: ” ايچينده اوزدويوموز بو آرخين سونونو آراماغا، آختارماغا
گئديرم”.
کيچيک باليقلار دئديلر: ” بو آرخ دئييل کي، بيز بونا چاي دئييريک”.
بالاجا قارا باليق بير شئي سؤيله مه دن سوسقونجا دوردو. کيچيک باليقلاردان
بيريسي دئدي: ” هئچ بيليرسن مي باليق اودان قوش او طرفلره گئدن باليقلاري
اوولايير؟”
بالاجا قارا باليق دئدي: ” هه، بيليرم”.
کيچيک باليقلاردان بير باشقاسي سؤيله دي: ” باليق اودان قوشون چوخ بؤيوک بير
کيسه سي نين وار اولدوغونو دا بيليرسنمي؟ ”
بالاجا قارا باليق دئدي: ” بونو دا بيليرم”.
کيچيک باليق سوردو: ” بوتون بونلاري بيله رک يئنه ده گئتمکمي ايسته ييرسن؟ ”
قاراجا باليق دئدي: ” هه، نئجه اولورسا-اولسون گئتمه لييم”.
باليقلارين آراسيندا پيچي- پيچي صؤحبتلر باشلادي کي، بالاجا قارا باليق چوخ
اوزاقلاردان يولا دوشوب گلميش و چايين سونونو آراييب تاپماق ايسته يير. باليق اودان
قوشدان دا قورخمور! کيچيک باليقلاردان بير نئچه سي بالاجا قارا باليغا قاتيليب گئتمک
خيالينا دوشدولر. آنجاق بؤيوکلري نين قورخوسوندان سسلريني چيخارا بيلمه ديلر. بير
نئچه سي ده سؤيله دي: ” باليق اودان قوش اولماسايدي سنينله گلرديک. بيز باليق اودان
قوشدان قورخوروق”.

www.durna.eu 12
چايين کناريندا بير کند وار ايدي. کندين قادينلاري و قيزلاري چايدا پالتار
يويوردولار. بالاجا قارا باليق بير سوره پالتار يويان قيزلارين ماهنيلاريني دينله دي. بير
سوره ده چايدا چيمن اوشاقلارا تاماشا ائتديکدن سونرا يولچولوغونا داوام ائتدي. گئتدي …
گئتدي… گئتدي… بير داها گئتدي. آرتيق گئجه اولموشدو. بير داشين آلتينا سيغينيب ياتدي.
گئجه ياريسي يوخودان اوياندي. گؤردو آي سويون ايچينه دوشموش و هر يئري
ايشيقلانديرميشدير. بالاجا قارا باليق آيي چوخ سئويردي. گئجه لر آي سويا دوشدويو
زامان ياتديقلاري داشين آلتيندان چيخيب آيلا دانيشماق، اونونلا آرخاداش اولماق ايستردي.
آنجاق هر دفعه ده آناسي مانع اولاردي .
بالاجا قارا باليق آيين يانينا گئديب دئدي: ” اسنليکلر
* آي، گؤزل آي”.
آي دئدي: ” اسنليکلر قاراجا باليق. سن هارا بورا هارا!؟ ”
قاراجا باليق دئدي: ” دونياني گزمه يه چيخميشام”.
آي دئدي: “دونيا چوخ بؤيوکدور. بوتون دونياني گزه بيلمزسن”.
قاراجا باليق دئدي: “اولسون. باشارديغيم قدر گزه جه يم”.
آي دئدي: ” گون دوغانا قدر سنين يانيندا قالماق ايسترديم. آنجاق قارشيدان قارا بولود
گلير. منيم اؤنومو کسيب ايشيغيمين قارشيسيني آلاجاق”.
قاراجا باليق دئدي: “سئوگيلي آي، من سني چوخ سئويرم. سنين ايشيغي نين
وورغونويام”.
آي دئدي: “سئوگيلي بالاجا قارا باليق، منيم ايشيغيم يوخدور. من ايشيغي گونشدن آليب
يئره گؤندريرم. سن هئچ بيليرسنمي کي، اينسانلار اوچوب گليب منيم اوزَريمه قونماق
ايسته ييرلر؟ ”
باليق دئدي: ” اولا بيلمز، بو مومکون دئييل”.
آي دئدي: “چتين ايشدير، آنجاق اينسانلار ايسته ديکلري هر شئيي”…
آي سؤزونو بيتيره بيلمه دي. قارا بولود آيين اوزرينه سريلدي. هر يئر قارانليق اولدو.
بالاجا قارا باليق يئنه ده يالنيز قالدي. بير نئچه دقيقه قارانليغي و سسسيزليگي دينله دي،
سونرا دا بير داشين آلتينا گيريب يوخويا دالدي .
سحر ائرکن يوخودان قالخارکن باشي نين اوستونده پيچيلداشان بير نئچه کيچيک باليق
گؤردو. باليقلار بالاجا قارا باليغين يوخودان اويانماسيني گؤردوکلري آن بير آغيزلا سؤيله
ديلر: ” گون آيدين، بالاجا قارا باليق.”
بالاجا قارا باليق اونلاري تانيميشدي، دئدي: “گون آيدين! سانکي منيمله يول يولداشي
اولماق قرارينا گلميشسينيز، دئييلمي؟ ”
باليقجيقلاردان بيري دئدي: ” هه، آنجاق هله ده قورخوروق”.
بير باشقاسي دئدي: ” باليق اودان قوشون قورخوسو بيزي ترک ائتمير”.
بالاجا قارا باليق دئدي: ” سيز چوخ فيکيرلشيرسينيز. گئجه گوندوز اوتوروب سادجه
فيکيرلشمک دوغرو دئييلدير. يولا دوشدوکدن سونرا قورخو حيسسيميز يوخ اولاجاق”.
حرکت ائتمک، يولا دوشمک ايسته ييرديلر کي، اطرافداکي سولار قالخدي و
باشلاري نين اوستونو بير قارا اؤرتو اؤرتدو. هر يئر قاپ-قارانليق اولدو. قاچيش يولو
قالمادي. بالاجا قارا باليق آنلادي کي، باليق اودان قوشون تله سينه، کيسه سينه دوشموشلر .
سالام
*

www.durna.eu 13
بالاجا قارا باليق دئدي: ” دوستلار، بيز باليق اودان قوشون تله سينه دوشدوک.
آنجاق قاچيش يولو تام اولاراق قاپانماميشدير”.
کيچيک باليقلار آغلاماغا، سيزلاماغا باشلاديلار. بيريسي دئدي: “يازيق اولدوق.
قاچيش يولوموز قاپاندي. قاراجا باليق گوناهکار سنسن. سن بيزي يولدان چيخاردين”.
بير باشقاسي سؤيله دي: “ايندي باليق اودان قوش بيزيم هاميميزي اوداجاق. يازيق
اولدوق. ايشيميز بيتدي”.
بيردن قورخونج گولوش سسلري هر طرفي ساردي. بو سس باليق اودان قوشون
گورولتولو گولوشلري نين سسي ايدي. باليق اودان قوش قورخونج گولوشلرينه قاريشميش
سؤزلرله دئدي: “نه قدر دادليجا باليقلاردير بونلار…هاهاها…هاهاها…يازيق باليقجيقلار.
سيزين حالينيزا اوره ييم يانير. سيزي هئچ اوداسيم گلمير…هاهاها”…
کيچيک باليقلار يالوارماغا باشلاديلار: ” ائي بؤيوک وارليق بيز سيزين تعريفينيزي
چوخ اؤنجه لر ائشيتميشيک. اگر لوطف ائديب ديمديگينيزي بير آزجيق آرالاسايدينيز بيز
بوردان چيخيب و عؤمروموزون سونونا قدر ده سيزه دوعا ائدرديک”.
باليق اودان دئدي: “من سيزي هله اودماياجاغام. هله قارنيم توخدور. قارنيما باخسانيز
گؤررسينيز. سيزي بير آزدان يئيه جه يم”.
کيچيک باليقلار باليق اودانين معده سينه باخيب خئيلي اؤلموش باليق گؤروب،
قورخودان زاغ-زاغ تيترمه يه باشلاديلار. کيچيک باليقلار دئديلر: ” ائي اولو وارليق،
ائي دنيزلرين شاهي، بيز بير ايش گؤرمه ميشيک. بيزيم هئچ بير سوچوموز يوخدور.
بيزي يولدان چيخاران بو قاراجا باليق اولدو”.
بالاجا قارا باليق دئدي: “قورخاقلار! ائله بيليرسينيز بو قدار باليق اودان سيزين بو
عاجيزانه يالواريشلارينيزا رحممي ائده جک؟ ”
کيچيک باليقلار دئديلر: ” سن هئچ نه دانيشديغي نين فرقينده سن مي؟ ايندي گؤره
جکسن کي، نئجه ده چوخ حؤرمتلي باليق اودان جنابلاري بيزي آزاد ائديب، سني ايسه
معده سينه طرف يولا سالاجاق”.
باليق اودان دئدي: ” هه ائله دي. من سيزي باغيشلايا بيلرم. آنجاق بير شرطيم وار”.
کيچيک باليقلار بير سسله دئديلر: ” شرطينيزي بويورون ائي اولو باليق اودان”.
باليق اودان دئدي: “اؤزگورلوگونوزو قازانماق اوچون او قارا باليغي اؤلدورمه
ليسينيز”.
قاراجا باليق اؤزونو بير طرف چکيب کيچيک باليقلارا دئدي: “کسينليکه اونون
تکليفيني قبول ائتمه يين. بو ريياکار باليق اودان ايسته يير بيزي بير- بيريميزه
اؤلدورتسون. منيم بير پلانيم وار”…
آنجاق کيچيک باليقلار اؤزگورلوکلريني الده ائتمک اوچون قاراجا باليغي دينله مه دن
اونا هوجوم ائتمک ايسته ديلر. قاراجا باليق يئرينده مؤحکم دوراراق ياواشجا سؤيله دي:
“قورخاقلار، هر حالدا سيز اسير دوشموشسونوز، قورتولوش يولونوز دا يوخدور. منه ده
گوجونوز چاتماز”.
کيچيک باليقلار دئديلر: “سني اؤلدورمه لي ييک. بيز اؤزگورلوگوموزو ايسته
ييريک”.
قاراجا باليق دئدي: ” عاغلينيزيمي ايتيردينيز؟ سيز مني اؤلدورسنيز بئله، يئنه ده
اؤزگورلوگونوزو الده ائده بيلمه يه جکسينيز. اونون فيريلداقلارينا اينانمايين”.

www.durna.eu 14
کيچيک باليقلار دئديلر: ” سن بو سؤزلري جانيني قورتارماق اوچون سؤيله ييرسن.
سن بيزيم حياتيميزي دوشونمورسن”.
قاراجا باليق دئدي: ” ديققتله قولاق آسين. من سيزه بير شئي سؤيله يه جه يم. من
باليق اودانين قارنينداکي اؤلو باليقلارين ايچينده اؤزومو اؤلموشلويه ووراجاغام. اوندان
سونرا باخاق گؤرک باليق اودان سيزي آزاد بوراخاجاقمي؟ اگر منيم سؤزلريمي دينله مه
سنيز بو قيلينجلا هامينيزي اؤلدوره جه يم. سونرا دا باليق اودانين قارنيني سؤکوب گئده
جه يم و سيز”…
کيچيک باليقلاردان بيريسي قاراجا باليغين سسيني کسه رک دئدي: ” يئتر، يئتر داها.
من بو سؤزلري دينلمک ايستميرم.اوهو…اوهو…اوهو”…
قاراجا باليق اونون آغلاماسيني گؤروب دئدي: ” بو ناز-نازيني نييه اؤزونوزله
گتيرميشسينيز؟ ”
سونرا قيلينجيني قينيندان چيخاريب اونلارين گؤزلري اؤنونه توتدو. اونلار ايسه چاره
سيز قالاراق بالاجا قارا باليغين تکليفيني قبول ائتديلر. بير- بيرلري ايله بير آز
بوغوشدوقدان سونرا بالاجا قارا باليق اؤزونو اؤلموشلويه ووردو. کيچيک باليقلار باليق
اودانا دئديلر: “اولو باليق اودان، او حياسيز قاراجا باليغي اؤلدوردوک”.
باليق اودان گوله رک دئدي: “چوخ ياخشي ايش گؤردونوز. گؤردويونوز بو ايشين
حسابينا ايندي سيزين هامينيزي ديري- ديري اوداجاغام. آرتيق قارنيم آجيقماقدادير”.
کيچيک باليقلار ايلديريم سورعتي ايله اودولاراق باليق اودانين معده سينه يوللانديلار.
دوغرودان دا ايشلري بيتدي .
بالاجا قارا باليق بو آن قيلينجيني چيخاريب باليق اودانين قارنيني سؤکه رک ديشارييا
توللاندي. باليق اودان قارنينين آغريسيندان باغيرماغا باشلادي. بالاجا قارا باليغي ايزله
مک ايسته دي، آنجاق باشارمادي. سويا باتاراق اؤلدو .
بالاجا قارا باليق گئتدي، گئتدي، گئتدي. آرتيق گونش گؤيون اورتاسيندا ايدي. آرتيق
داغ دره سونا وارميشدي. چاي گئنيش بير دوزنگاهدا آخيردي. ساغ- سولدان بير نئچه
باشقا چاي دا بالاجا قارا باليغين بولوندوغو چايا قاتيليردي. قاراجا باليق عؤمرونده بو قدر
سو گؤرمه ميشدي. سويون چوخلوغونا حئيرت ائدير، لذت آليردي. بيردن اؤزونه گلدي و
گؤردو کي، سويون ديبي گؤرونمور. نه قدر چابالاديسا سويون ديبيني گؤره بيلمه دي.
ايسته ديگي کيمي سودا اوزوردو. آنجاق سويون حددي-حودودونو گؤره بيلميردي. بير آن
يئکه بير حئيوانين سورعتله اونا طرف گلديگيني سئزدي. بو حئيوانين آغزي نين قاباغيندا
قايچي کيمي بير ميشار گؤرونوردو. بالاجا قارا باليق فيکيرلشدي کي، آرتيق عؤمرونون
سونو گلميش و اينديجه ميشارباليق اونو پارام-پارچا ائده جک. سورعتله اؤزونو سويون
اوزَرينه چيخاردي. بير آزدان بير داها دنيزين ديبلريني گؤرمک اوچون سويون
درينليکلرينه دالدي .
سويون اورتاسيندا بير سورو باليغا راست گلدي. مينلرجه، اون مينلرجه باليق
سوروسو. بيريسيندن سوردو: ” آرخاداش، من قريب بيريسي يم. اوزاقلاردان گليرم. بورا
هارادير؟ ”
باليق، آرخاداشلاريني سسله يه رک دئدي: ” باخينيز، بيريسي داها گلميش”. سونرا
دا بالاجا قارا باليغا دئدي: ” آرخاداش، دنيزه خوش گلميسن”.
باليقلاردان بير باشقاسي دئدي: “بوتون چايلار و آرخلار بورايا تؤکولور. آنجاق
بعضيلري ده باتاقليقلارا هوپور”.

www.durna.eu 15
ديگري دئدي: ” نه زامان ايسته سن بيزيم دسته ميزه قاتيلا بيلرسن”.
بالاجا قارا باليق هدفينه، دنيزه چاتديغي اوچون سئوينيردي. دئدي: “ايذن وئرسه نيز
چيخيب بير آز تک باشيما دنيزي سئير ائديم، سونرا گليب سيزه قاتيلارام. ايسته ييرم بو
دفعه باليقچيلارين تورونو دارتيب دنيزين ديبينه چکديگينيزده من ده آرالارينيزدا اولوم”.
باليقلاردان بيري دئدي: “تئزليکله اؤز ايسته يينه چاتارسان. ايندي گئت سئير ائله.
گئت گز، آنجاق دنيزين اوزونه چيخديغيندا باليق اودان ناققايا راستلانسان ديققتلي اول.
ناققانين هئچ ندن قورخوسو يوخدور. هر گون دؤرد- بئش باليق يئيير. باليقلارين باش
بلاسي اولموش”.
بالاجا قارا باليق باليقلار سوروسوندن آيريليب اوزمه يه باشلادي. بير آزجيق زامان
کئچديکدن سونرا دنيزين اوزرينه چيخدي. گونشلي بير گون ايدي. بالاجا قارا باليق
گونشين دادلي حرارتيني آرخاسيندا حيسس ائدرَک لذت آليردي. بؤيوک بير سئوينج و
موتلولوق ايچينده سئير ائدير و فيکيرلشيردي: ” اؤلوم هر آن مني ياخالايا بيلر. آنجاق من
باشارديغيم قدر ياشامالي، اؤلومدن قاچمالييام. يالنيز اؤلومله قارشيلاشا دا بيلرم. اؤنملي
دئييل، اؤنملي اولان بودور کي، منيم حياتيم و يا اؤلوموم باشقالاري نين حياتينا نئجه تاثير
گؤستره جکدير”.
بالاجا قارا باليق بو خياللاريندان آيريلمادان باليق يئين ناققايا توش گلدي. بالاجا قارا
باليق ناققانين ايکي ديمديگي آراسيندا چابالايير، وورنوخوردو. ناققا بالاجا قارا باليغين
بئليني يئکه ديمديکلري ايله ائله سيخيشديريردي کي، آز قالميشدي قاراجا باليغين جاني
چيخسين. کيچيک بير باليق سودان کناردا نه قدر ديري قالا بيلر کي؟ بالاجا قاراباليق
فيکيرلشدي کئشکه ناققا اونو تئز اودسايدي. چونکو اونون معده سينده کي روطوبت
اوزوندن بير آز داها ديري قالا بيلردي. بو فيکريني گئرچکلشديرمک اوچون ناققايا دئدي:
“نييه مني ديري- ديري اودمورسونوز؟ من او باليق نؤوعلريندنم کي، اؤلدوکدن سونرا
بدنلري زهر تولوغونا دؤنور”.
ناققا بير شئي دئمه دي، آنجاق اؤز-اؤزونه فيکيرلشدي: ” آي حوققا باز. ايسته ييرسن
مني صؤحبته توتوب آغزيمدان چيخيب قاچاسان”.
ساحيل اوزاقدان گؤرونور و ناققا ساحيله طرف گئديردي. بالاجا قارا باليق
فيکيرلشدي: “ساحيله چاتديقدان سونرا آرتيق منيم ايشيم بيتميشدير دئمکدير”. بو اوزدن ده
دئدي: ” بيليرم مني بالالارينا يئم اولاراق آپاريرسان. آنجاق من ساحيله چيخديقدان سونرا
اؤله جه يم، بدنيم باشدان آياغا زهر اولاجاقدير. بالالارينا يازيغين گلميرمي؟ ”
ناققا دوشوندو: “احتياط دا ياخشي شئيدي. سني اؤزوم يئيرم، بالالاريما باشقا باليق
اوولارام… آنجاق باخيم گؤروم مني آلداتمير کي”. ناققا بو فيکيرده ايدي کي، گؤردو
بالاجا قارا باليغين بدني حرکتسيزلشميش و ترپنمير. فيکيرلشدي: ” يعني اؤلدومو؟ واي
واي آرتيق اؤزوم ده يئيه بيلمه يه جه يم. بو قدر دادلي باليغي نه حاق اؤزومه حارام ائتديم.
الدن چيخارديم”.
بو اوزدن قاراجا باليغا؛ “هئي کيچيک باليق بير آزجيق جانين وارمي سني يئييم،
يوخسا اؤلموسن؟” دئيه سسلنمک ايسته دي. آنجاق سؤزونو بيتيره بيلمه دي. آغزي
آچيلار-آچيلماز بالاجا قارا باليق اؤزونو دنيزه آتدي. ناققا گؤردو کي، بالاجا قارا باليق
اونو آلداتميش، باشلادي قاراجا باليغين آرخاسينا دوشوب تعقيب ائتمه يه. بالاجا قارا باليق
اؤزونو قورتولموش سانيردي، آنجاق ناققا ايلديريم سورعتي ايله اونون آرخاسينجا ايدي.
ناققا قاراجا باليغي ياخالاييب و ياخالاجاق دا اوددو. بو حاديثه او قدر سورعتله

www.durna.eu 16
گئرچکلشدي کي، بالاجا قارا باليق نه لر اولدوغونو آنلايا بيلمه دي. آنجاق هر طرفين
روطوبتلي و قارانليق اولدوغونو ياواش ياواش سئزمه يه باشلادي. بير آز داها زامان
کئچديکدن سونرا بير آغلاما سسي ائشيتدي. گؤزلري قارانليغا آليشديقدان سونرا بير
کونجه سيخيليب آغلايان، آناسيني چاغيران کيچيک بير باليغي گؤردو .
بالاجا قارا باليق اونا ياخينلاشيب دئدي: “آرخاداش، آغلاماق، آناني چاغيرماق چاره
دئييلدير. قالخ و اؤز آزادليغي نين اوغروندا فيکيرلش، بير ايشلر گؤر”.
باليقجيق دئدي: “سن ده داها کيمسن، گؤرمورسنمي محو اولماقدايام.
اوهو…اوهو..اوهو…آنا…آي آنا بير داها سنينله بير يئرده باليقچيلارين تورلاريني دارتيب
دنيزين ديبينه آپارا بيلمه يه جه يم. اوهو… اوهوو”.
بالاجا قارا باليق دئدي: ” کس سسيني، سن دونيادا نه قدر باليق وارسا هاميسي نين
آبريني آپاردين”.
باليقجيق آغلاماسيني دوردوردوقدان سونرا بالاجا قارا باليق دئدي: “من ناققاني
اؤلدورمک و بوتون باليقلاري بو قدار حئيوانين تهلوکه سيندن قورتارماق ايسته ييرم.
آنجاق منيم ايشلريمه قاريشماماق، ال آياغيما دولاشماماق اوچون اؤنجه سني بوردان آزاد
ائديب ديشارييا گؤندرمه لييم”.
باليقجيق دئدي: ” سن اؤزون اؤلمک اوزره سن ناققاني نئجه اؤلدوره جکسن؟ ”
بالاجا قارا باليق قيلينجيني گؤستريب دئدي: “بو قيلينجلا اونون قارنيني سؤکه جه يم.
ايندي ديققتله مني دينله. من ناققانين قارنيندا رقص ائتمه يه باشلاياجاغام. بو زامان ناققانين
قيديغي گله جک و باشلاياجاق گولمه يه. ناققانين آغزي آچيلديغي زامان سن اؤزونو
ديشارييا توللا”.
باليقجيق دئدي: ” سن اؤزون نه اولاجاقسان؟ ”
بالاجا قارا باليق دئدي: ” سن مني دوشونمه. من بو قداري اؤلدورمه يه نه دَک
بوردان چيخماياجاغام”.
بالاجا قارا باليق بو سؤزلري دئديکدن سونرا ناققانين قارنيندا رقص ائتمه يه باشلادي.
بو حرکتدن خوشلانيب قيديقلانان ناققا ” هاها هاهاه هاها ” گوله مه يه باشلادي. بو آن
باليقجيق اؤزونو ناققانين آغزيندان ديشاري، دنيزه آتدي. آنجاق نه قدر گؤزله دي ايسه
بالاجا قارا باليقدان خبر چيخمادي .
بير آز داها زامان کئچديکدن سونرا باليقجيق گؤردو کي، ناققا آغريدان، درددن
گرنَشه رک باغيرماغا باشلادي. سونرا دا شاپپيلتي ايله دونبالاق آشاراق سويا دوشوب
جان چکيشدي. آنجاق بالاجا قارا باليقدان خبر چيخمادي کي، چيخمادي. بو گونه قدر ده
اوندان بير خبري اولان يوخدور .
ياشلي باليق ناغيليني بيتيردي. اون ايکي مين نوه- نتيجه سينه “آرتيق ياتماق واختيدير
چوجوقلار گئدين ياتين” – سؤيله دي .
ياشلي باليغين نوه- نتيجه لري بير آغيزلا: “ننه جان بالاجا قارا باليغين سونونون نئجه
اولدوغونو سؤيله مه دين” – دئديلر .
ننه باليق دئدي: “ائولادلاريم، او دا قالسين گلن گئجه يه. ايندي ايسه گئديب ياتين.
گئجه نيز خئييره قالسين”.
اون بير مين دوققوز يوز دوخسان دوققوز کيچيک باليق: “سنين ده گئجن خئييره
قالسين ننه” – سؤيله ييب ياتديلار. ننه باليق دا ياتدي. آنجاق کيچيک قيرميزي باليق نه قدر

www.durna.eu 17
چاليشديسا ياتا بيلمه دي. يوخوسو گلميردي. او، سحردک دنيز عشقي ايله يئرينده
چابالاييب دوردو. يالنيز بير شئي دوشونوردو: دنيز …

Recent posts

Recent comments