ايراندا تورك خالقى تقريبن تمامى ايله آسيميله اولموشدور. تورك خالقى و آذربايجانين كيملييىنين ان تمل و بيرجه مشخصه سى ايسه تورك ديلىدير .
دؤولت و فارس ميللتچىلرينين اساس آماجى٬ فارس ديلينى تورك لرين ميللى ديلى و حتتا اؤز آرالاريندا ايشله تديكلرى انسيت و رابيطه ديلينه چئويرمكدير.
هر واقت تورك خالقى اؤز گونده ليك ياشاميندا٬ آيدينلارى ايسه بير بيرى ايله باغ قورماقدا٬ ايسته يه ره ك تورك ديلينين يئرينه ٬ فارس ديلينى ايشله تمه يه باشلاسالار٬ دئمك او گون تورك خالقى آسيميله اولوب و يوخ اولموشدور٬ اؤلموشدور.
بابك مراسيمى دارتيشمالارى ايله علاقه لى٬ پخش اولان بيلديرىلر و بو بيلديرىلر حاققيندا ياييلان آچيقلامالارين٬ هر ايكىسينين ده فارس ديلينده اولماسى٬ گئرچكدن دوشوندوروچو و تاسف وئريچى٬ منجه تمامى ايله گره گ سيز٬ حتتا ضررلى بير رفتاردير و فارسلاشمانين ايلرى صفحه لره چاتديغينى گؤستره رير.
آذربايجانلىلار و تورك خالقينى علاقه له نديره ن٬ بونلارين ايچ مساله سى ساييلان مووضوعلاردا آپاريلان دارتيشما و موباحيثه لرين ديلى٬ موطلق شكليده تورك ديلينده اولمالىدير. بو آپاريلان موباحيثه نين اؤزوندن ده داها اهمييتلىدير.
ايراندا تورك خالقينين هله الدن وئرمه دييى تك شئى تورك ديلىدير٬ اونا لاقيئد قالماق و يئرينه فارسجانى قويماغا چاليشماق هئچ بير شكليده ميللى و دئموكراتيك بير حركت ساييلابيلمز.
فارس ديلينده ياپيلان موباحيثه لر٬ مووضوعلارى نه اولورسا اولسون٬ اوزون موددتده٬ خالقيميزى يوخ ائتمه يى آماجلايان٬ فارسلاشديرما سيياستينين كؤنوللو – داوطلبانه شكلي و اونون اوزانتىسى اولماقدان باشقا بير شئى اولماياجاقدير.
