ايسماييلووا قدملي
اينسان دونيايا گلديگي آندان اعتيبارن ياشامي نين هر آنينا اويغون موعين فعاليتلري يئرينه يئتيرير؛ ايمکله يير، يئريگير، دانيشير، اويون اوينايير، مکتبه گئدير و س. بوتون بونلار هر بير آتا و آنانين اؤز اؤولادلاريندان گؤزله ديگي نورمال فعاليتلردير. لاکين بعضي اوشاقلاردا بو عادي حساب ائتديگيميز فعاليتلرين يئرينه يئتيريلمه سي داها گئج بير زاماندا باش وئرير. بو دا اونلاردا ديسلئکسييا آدلانان اؤيرنمه پوزونتوسونون اولدوغونو گؤسترير. ديسلئکسييا دينله مه، دانيشما، اوخوما، يازما، فيکير يوروتمه و ريياضي قابيليتلرين قازانيلماسي و ايستيفاده ائديلمه سي زاماني يارانان چتينليکلرله اؤزونو گؤسترن بير اؤيرنمه پوزونتوسودور.
ديسلئکسييا آنادانگلمه، اينکيشاف و زده يه باغلي اولاراق ايکييه آيريلير. آنادانگلمه ديسلئکسييا دوغوم اولي، دوغوم زاماني و دوغوم سونراسي فسادلارا باغلي اولاراق اوچه آيريلير.
آنادانگلمه ديسلئکسييايا زيف و رئژيمسيز قيدالانما، حاميله ليک زاماني کئچيريلن اينفئکسييالار و يانليش درمان ايستيفاده سي سبب اولا بيلر. اوزون و چتين دوغوش زاماني اوشاغين نفس آلماسينداکي گئجيکمه و سونرادان کئچيرديگي قيزديرمالي خسته ليکلر ده ديسلئکسييانين سببلريندندير.
ايرسي فاکتورلارا باغلي اولاراق دا ديسلئکسييا اورتايا چيخا بيلر.
ديسلئکسييا آنادانگلمه بير پروبلئم اولدوغو اوچون اوشاقلاردا ائرکن ياشلاردا اؤزونو آشاغيداکي علامتلرله گؤسترير:
دانيشمادا گئجيکمه
يئني سؤزلري گئج اؤيرنمه
حرکت و کوورديناسييا پوزوقلوغو
ايستيقامت (ساغ، سول، يوخاري، آشاغي) و زامان (بوگون، صاباح، اول،سونرا) آنلاييشلاريندا چتينليکلر
دانيشارکن دوزگون سؤزلردن ايستيفاده ائتمه مک
بعضن واليدئينلر بو علامتلري نورمال حال کيمي ديرلنديرير و اوشاقلاريندا هئچ بير پروبلئم اولماديغيني بيلديريرلر. لاکين اوشاقلار مکتبه باشلاديقدان سونرا بو سايديغيميز علامتلرين داها کسکين فورمالاري اؤزونو گؤسترير.
مکتب دؤنه مي گؤرولن علامتلر:
حرفلري اؤيرنمه ده چتينليک
سؤزلري هئجالامادا چتينليک
سؤزلري و اوبيئکتلرين آديني خاطيرلامادا چتينليک
يازيلاري اوخومادا چتينليک
اوخشار سسلري و حرفلري فرقلنديره بيلمه مک
اوخويارکن سؤزلري، سطيرلري بوراخماق
يازي يازمادا چتينليک (52 عوضينه 25، کيتاب عوضينه باتيک يازماق و س.)
سؤزلرين دوزگون معنالاريني بيلمه مک
يازي يازماغي و اوخوماغي باجارسالار بئله، يازيدا چوخلو ايملا سهولري بوراخماق و چوخ گئج اوخوماق
اينسانلارين بير قيسمي ديسلئکسييانين خسته ليک اولدوغونو ديگر بير قيسمي ايسه بونو ذکا سويييه سي نين آشاغي اولماسي ايله علاقه لنديرير. لاکين بونلارين هئچ بيري دوغرو دئييل. حتّی ذکا سويييه سي يوکسک اولان بير چوخ مشهورلار دا بئله ديسلئکسييا مؤوجود اولوب. مثلن: والت ديسنئي، آلبئرت ائينستئين، توم جروز، بيلل گاتئس،لئوناردو دا وينجي، رودين، هارري بئلافونتئ و س.
ديسلئکسييانين خوصوصي بير موعاليجه اوسولو يوخدور. آنجاق آشاغيداکي اونسورلر اونلارين موعاليجه سينده بؤيوک رول اوينايير:
دوغرو قيدالانما
عاييله ده و جمعيتده اونا قويولان دوزگون موناسيبت
اؤزل درسلر (بورادا اونون اؤيرنمه قابيليتي نين آرتماسي اوچون داها ماراقلي و اَيلنجه لي اؤيرنمه مئتودلاريندان ايستيفاده ائديلير)
ديسلئکسييانين ائرکن ياشلاردا دياقنوزو چوخ واجيبدير. بو حالدا او مکتبه قدر اولان مودتده موعين درجه ده اينکيشاف ائتميش اولار و آرتيق مکتب زاماني اؤزياشيدلاريندان گئري قالماز ، همچينينده مکتب فوبيياسي يارانماز.
گؤرولن بوتون پروبلئملرله ياناشي ديسلئکسييالي فردلرين بير يا دا بير نئچه ساحه ده اوستون قابيليتلري اولا بيلر. اونلارين اينجه صعنت، فردي ايدمان، تئكنولوگييا، مئكانيکي، ويزوال-فضا ساحه لرينده قابيليتلري آراشديريلماليدير. بو ساحه لرين فرق ائديلمه سي حياتلاري نين پلانلاشديريلماسي باخيميندان بؤيوک اهميت داشيماقدادير. همچي نين مووففقيت دويغوسو ياشاماسي و منليک حؤرمتي نين آرتماسي باخيميندان دا اهميتليدير.
