Saturday, September 18, 2021
HomeGüneyروزنامه ميزين ديلى  - سيد جعفر پيشه ورى

روزنامه ميزين ديلى  – سيد جعفر پيشه ورى

Author

Date

Category

روزنامه ميزين ديلى 
 

سيد جعفر پيشه ورى

آذربايجان دئموقرات فيرقه سينين مركزى اورقانى

آذربايجان قزئتى٫ نؤمره ٢

١٢ شهريور٫ ١٣٢٤ هيجرى شمسى

 
 

روزنامه ميز آذربايجان ديلينه آرتيق اهمييت وئره جكدير. ديليميز دوشمنلرين بوش ايدديعالارينا باخماياراق چوخ گئنيش و غنى بير ديلدير. اونون ريشه سى خالقيميزين قانيندا و اوره يينده ده ير. 
 

بيز اونو آنا سودو ايله اميب وطنيميزين روحنواز هاواسى ايله تنففوس ائتميشيك. اونا تووهين ائده نلر٫ اونو تحميلى و مصنوعى گؤسته رمك ايستييه نلر بيزيم حقيقى دوشمنلريميزدير. 
 

چوخ خائين و اجنبى عونصورلر ايله بو گؤزه ل ديلى اورتادان قالديرماغا چاليشميشلار. اونون ترققيسينه و ياشاماسينا مانئع اولماق مقصدى ايله مخصوصن ان غددار آزادليق دوشمنى اولان ريضاخان دؤولتى٫ وار قوووه سينى صرف ائتميشدير. بونونلا بئله او سارسيلماز و مؤحكم بير حالدا خالقين ايچريسينده باقى قاليب اؤز مقامينى ساخلاميش٫ بو واسيطه ايله مدنى و موترققى بير ديل اولدوغو ايثباته يئتيشميشدير. 
 

آذربايجان ديلى دئيمى بير ديل دئييلدير. اونون بؤيوك خالق٫ گئنيش جماعت قوووه سى كيمى آرخاسى واردير. ديليميز خالقين ياراتديغى داستانلار٫ ضرب المثللر٫ حيكايه و ناغيللار واسيطه سى ايله دونيانين ان بؤيوك ديللرى ايله رقابت ائده بيلر. شاعيرلريميز٫ اديبلريميز بو ديل واسيطه سى ايله اؤز ائحساساتلارينى و اؤز هونر و صنعتلرينى ووجودا گتيريب خالقين نظرينى جلب ائده بيلرلر.  
 

بيزيم وظيفه ميز اونو گئنيشله نديرمك٫ اونو موعاصير حالا سالماق٫ اونون گؤزه لليكلرينى اينجه ليكلرينى حيسسيياتينى توز تورپاق آلتيندان چيخاريب و عالى بير ظرف ايچريسينده خالقا تقديم ائتمكدن عيبارتدير. 
 

آذربايجان ديلى او قده ر قوووتلى و اونون صرف و نحو قايدالارى او قده ر مؤحكم و طبيعىدير كى٫ حتتا اونون ايچينه واريد ائديلميش فارس و عرب كلمه لرى ايخراج ائديلسه بئله٫ اونونلا بؤيوك فيكيرلرى٫ عالى مقصدلرى يازيب شرح  وئرمك مومكوندور. لاكين بيز خالقين ايستئعدادينى نظرده توتوب بو ايشى ناگهانى بير صورتده گؤرمه يه ائحتيياج حيسس ائتميريك. 
 

عقيده ميزه گؤره يازى گره ك خالقين دانيشديغى و آألاديغى بير شيوه ده ايدامه تاپسين. مقصديميز ادبى موسابيقه دئييل. خالقى باشا سالماق٫ اونا حقيقتى آشكار بير صورتده گؤسترمكدير. او جهتدن بيز خالق طرفيندن قبول ائديليب ايستئعمال اولونان عرب و فارس كلمه لرينين مووققتى اولسا بئله ساخلاماق لوزومونو اينكار ائتميريك. لاكين اونلارى اؤز ديليميزين قايدالارينا تطبيق ائديب آهنگينه اويغون بير حالا گتريمه لىييك.  
 

دونيادا بير ديل تاپيلماز كى ٫ او تامامييله موستقيل اولسون و قونشو ديللرين تاثيرينه دوشمه سين. بيزيم آذربايجان ديلى ده آذربايجانين تاريخى و جوغرافى مؤوقئعينه گؤره اجنبى ديللرين تاثيريندن كناردا قالماميشدير. ايستر ايسته مز بير چوخ بيگانه كلمه لر خالقيميزين آغزينا دوشموش٫ مورور-ى زامان ايله ميللىلشميشدير. بيز ديلين تكامولونو نظرده توتوب او كلمه لردن ايستيفاده ائتمه يى لازيم بيليريك. لاكين بوندان  سوء-ى ايستيفاده ائديب و يازينى غليظ لشديرمك٫ وحشى و معناسى آنلاشيلماز كلمه لرى حئسابا قاتماغا جيددن موخاليفت ائتمه لىييك.  
 

آذربايجان يازيچيلارى قبول ائتديكلرى بير چتين و آغير وظيفه نى ايمان و عقيده ايله ايفا ائتمكله ديليميزين گؤزه   ل لييينى و اونون ترققيسى و تكامولونو تامين ائده جكلرينه بيزيم جيددى ايمانيميز واردير.  
  

LEAVE A REPLY

Please enter your comment!
Please enter your name here

Recent posts

Recent comments