قادين دونياسينا يئني بير فلسفي باخيش
اؤز رفتار لاريميزين سببلري نين آرخاسيندا ، شبهه سيز كي گيزلي سببلرده واردير ، اونلاري آشكار ائتمك ايسته ميريك . بئله بير سببلرين آرخاسيندا داها گيزلي سببلرده وارديرلاركي حتي اؤزوموزده اونلاري تانيميريق . سويداش خالقلار، سويداشليق روحلاريني پلانلاشديران گيزلي جزئياتا مالك اولدوقلار ينا گؤره بيري بيرلرينه بنزه ييرلر ، آنجاق آشكار ذاتلار ينين عكسينه اولاراق كي اونلارين تربيه و اؤزه لليكله ارثي خصوصيتلرين حاصلي دير ، اونلاري بيري بيريندن فرقلنديرير.
دونيا خالقلارينين ياريسيندان چوخونو تشكيل ائدن قادينلار ، گيزلي و آشكار خصوصيتلره ماليك اولاراق ، اونلارين جنسي ذاتي اؤزلكلري نه اينكي تماميله كيشي لردن ، يعني ائركك لردن باشقادير بلكه اونلارين سويداشليق روحي و ميللي و اؤزه ل ليكلري ده تماميله باشقا دير. نه اينكي بو اؤزه ل ليكلر علمي جهت دن آراشديريلماميشدير ،بلكه عموميت له قادين دونياسي ، دونيا عاليملري نين طرفيندن تماميله كشف اولو نمامیشدیر.
قادين دونياسي چوخ اينجه اولماقلا ياناشي ، اولدوقجا مركٌب دير . بئله بير اينجه ليكلره و مركب ليكلره ماليك اولان قادينين هئچ اؤزوده ، بو خصوصيتلره ماليك اولار كن ، هله ده اونلاري تانيماميشلار . قادين دونياسينين هله ده كفايت قده ر كشف اولونماماسي ، اونلاري ايكينجي درجه لي بير انسان كيمي قيمتلنمه سينه گتيريب چيخارميشدير .
قادينين جسمي نين اينجه اولماسي و اونون بئني نين اركك لره نسبتاً كيچيك حجمده يارانماسي ، هئچده اونلاري باشقا انسان لارا گؤره قابليت سيز اولماغا دلالت ائده بيلمز. قادينين پيسكولو‍ژي خصوصيتلري او قده ر يوكسك دير كي ، هله ده كيمسه اونلارين دونيانين اداره ائتمه قابليتيني درك ائتمه يي باشارماق ايسته مه ميشدير . بوتون انسانلاريني بطنينده بؤيودوب دوغان و سونرا اونلاري تربيه ائدن قادين ، دونياني بئشيگه قوياركن اونوترپتمه يه ده قابليتي اولا بيلر؟!
آمما تأسفلر اولسون كي اوزاي لارا يول آچان انسان ،قادين دونياسيني حقيقي معنادا كشف ائده بيلمه ميشدير.منجه قادیني تانيمايان دونيا هله ده بير مدني دونيا دئيلدير.قادينا شهوت آلتي كيمي باخان انسانلار ، هله ده انسان خلقتينده قادينين هانسي سويده اولماسيني آنلاماميشلار.
بلكه دئمك اولار انسانلارين بويوك بدبخت ليكلرينين اساس سببلرينين چوخ اؤنملي سي قادين دونياسيني و قادين قابليتينين تانيماماسيدير.
قادينين گوزلليگي نين و اينجه ليگي نين آرخاسيندا چوخ جدٌي قابليت گيزلنميشدير كي اونو اهميت سيزسايماق سببلري ، اونون نه درجه ده اهميتلي اولدوغونو بير دفينه كيمي مدنيت سيزليك خرابه لري نين آلتيندا باسديرميشدير .
دونيا تاريخي ، انسان حياتيندا قادين باشچي ليغنا شاهد اولموشدور . آمما تأسفلر اولسون كي قادين باشچي ليغي نين تاريخي – علمي جهتدن آراشديريلماميشدير .آنجاق بونو هئچ زامان دانماق اولماز كي ، انسان جياتينا باشچيليق ائدن اركك لرين دونياسي ، نه قده ر ، آجيناجاقلي ، قانلي – قادالي و مدنيت سيز اداره اولونموشدور . دونيا تاريخينده هله بير قادينين فيلسوف اولماسي آشكار اولماسادا ، قادين عالمي اؤزو بير فلسفه دير .
قادين دونياسي خلقتين گيزلي و مركٌب بير مسئله سي اولدوغوندان ،هله ده تانيميش فلسفه لرينده قادين حاقيندا معين بير قرار اورتايا چيخماميشدير . اونا گؤره ده قادين عالمي فلسفي جهتدن آراشديريلمالي دير . نه زامانا قده ر كي قادين دونياسي نين فلسفه سي آيدين اولماميشدير ، قادين مسئله سي علمي جهتدن حل اولونماياجاقدير . قادين دونياسي حيات فلسفه سينده او قده ر سرٌلي دير كي ، حتي قادينين اؤزوده اونو آچيقلاماغا قادير اولا بيلمه ميشدير. بونا گؤره دونيا عاليملري قادين دنياسينا يئني بير فلسفي آچي دان باخمالي دير لار .آمما قادين فلسفه سي او قده ر مركب دير كي ، قادينا ايكينجي در جه لي بير اينسان كيمي باخيلان مدنيت سيز دونيادا ، قاديندان باشقا ، هئچ بير ار كه كه اعتبار قايل اولماق اولماز بونا گؤره من گونئي آذربايجان ميللتي نين بير قاديني اولاراق . دونيا تاريخينده بيرينجي دفعه اولاراق دونيانين بوتون قادينلاريني ، بير ليگه دعوت ائده رك يئني بير قادين دونياسيني ياراتماغا دعوت ائديره م سيز قادينلاري امين ائديره م كي هر قاديندا يئني بير قادين دونياسي ياراتماغا قابليت واردير.
تجربه گؤسترميشديركي ، نه اولوسلار آراسي و نه ده انسان حقوقلاريني مدافعه ائدن تشكيلات لاری ، بو گونه دك نه تك قادين حاقلاريني بلكه هئچ بير انسانين حقوقوندان مدافعه ائده بيلميشلر . بئله تشكيلاتلاري ائركك لر يالنيز اؤز قوردوقلاري حاكميتلرين قوروماق مقصدي ايله قوروموشلار و هئچده قادينلارين آنلايشينا دخلي يوخدور .
قادينلار گؤزه ل و عدالتي و صلح دونياسی ياراتماق قابليتينده مالك دير لر .قادينلارين دوغان خصوصيتلرينده هله ده كشف اولماميش گؤزه ل دونيانين يارانماسينا درين فلسفي دوشونجه لر واردير . بيز قادينلار بيرينجي آتديم اولاراق ، اركك لرين قادينلارا حاكم ائدن قانونلاري پوزمالييق .
بيز فيمينيست فلسفه سيني اولدوقجا تبليغ ائده رك نئوفیمینیست فلسفه سي نين يارانماسينا دوغرو محكم آتديم آتمالييق .دونيا قادينلاري، بيرله شين ، دونيا قادينلاري ! محكم آتديم لار لا ايره لي ، غلبه لي گله جك بيزيم دير . بيز کال كلمه لرده ، يالان قانونلاردا ، ديل سيز – آغيزسيز كتابلاردا و ژورنال لاردا ، قوندارما اجلاس لاردا ياشاماماليق .
بيز يالان تعريف لره و آلقيشلارا آلدانماماليق . بيز آزاد بير قادين كيمي ياشاماغا لايق اينسانيق .
بيز آزاد عملي بير حياتدا گؤزه ل ياشاماغي بوتون اينسان لارا اثبات ئتمه لييك، بيز خلقتدن بو گونه دك بوتون اینسانلارين برابر سيز ليگينه سون قويماغي اثبات ائده جه ييك بو سؤز لر خيال عالمي نين و عملي اولمايان قورو و بوش تئوري سي دئييل دير .
بيز قادينلار خلقتدن بو گونه دك آغير استثمار آلتيندا ياشاميشيق ، بيز مينلر ايل بوندان اوٌل دين و مذهب قانونلارينين آغير تضيقلري آلتيندا تاپدانميشيق .هئچ بير ايدئولوژونون گويا دموكراتيك قانونلاري، قادينلارين طبيعي حقوقونو تأمين ائده بيلمه ميشدير .
تاريخيين اوچونجو مين ايلليگي دونيا قادينلارينين دوغان دوراني اولماليدير چونكو قادينلار قابليتلريني و باجاريقلاريني بوتون سا حه لرده اثبات اتميشلر. دونيانين اتننيك لابراتوارلاريندا، چوخدان بري سينا قدان چيخاراق اثبات اولونموشدور .گلين بو لحظه دن بري اوز قابليتميزين اساسيندا يئني بير دونيا ياراتماق تمليني قوياق.
ياشاسين دونيا قادينلاري .
ياشاسين قادين قابليتينه حؤرمت بسله ين بوتون انسانلار
شهناز غلامي
عضو انجمن روزنامه نگاران زنان ايران (رزا )
