پيشيك ايله سيچان
بیری واریدی بیری یوخ ایدی. بیرقالابالیق سیچان عايیله سی بیر کاسیب ائوین دلیک دوشوگونده یاشاییردی. بیرگون سیچانین اوشاقلاریندان بیری آناسینا “سوسوزام” دئيیر. آناسی ، ائوین آشاغی باشیندا سوقابلارینین یانیندا همیشه يئره سوتوکولدوگونو بالاسینا آنلادیب، اونو اورایا گؤندرمک ایسته دی. آتا سیچان ايسه بومسئله یه قارشی چیخیب اوشاغی نین آخشاما قدر گؤزله مگینی ایسته دی. آناسیچان “یوخ جانیم هئچ زاد اولماز؛ بوعاییله نین عضولری چوخ مهرباندیلار؛ هم ده بوچاغدا باشلاری قاریشیق دیر” دییه اوشاغی سو یئرینه گؤندرمگه زورلادی. بالا سیچان دلیکدن چیخار- چیخماز بیرباشماق تایی اونو یئره یاپیشدیردی. آتاسیچان ایله آناسیچانین داوالاری قیزیشدی. آتا،”گؤردون وورارلار” دئییر، آما آنا قبول ائتمیر؛ و بالالارینین اؤلومونو بیر تصادوف کیمی گؤرمک ایسته ییر. گئجه یاریسی اوبیری اوغلان من آجام دئییر. آتاسی، بالاسینا “بیرآز دؤز،گئدیم آنبارداکی تلیسلرین بیرینی دلیب سنه بوغدا گتیریم” دئییر.
بالا سیچان اوزوقویلو یئره اوزانیب آیاقلارینی یئره دؤیوب، همن یئمک ایسته ییر. آناسی کیشینی پرپیله ییب.” بالام آجدیر، دؤزه بیلمز” دئییب اؤزو یولا دوشور. موطباغا گئتمک اوچون یاواش یاواش دووارین دیبیندن سوقابلارینین دالیندان ائوین آشاغی باشینا دوغرو سوزور. سوقابالارینین یانینا یئتشمه میش بیربالاجا بوشقابدا بیر تازا پنیر تیکه سی گؤروب، آللاهینا شوکرائدیب، پنیری گؤتوروب، همن یووایا دؤنور. آتاسیچان آروادینا پنیرین هاردان تاپدیغینی سورور. آناسیچان اولایی آنلاداندان سونرا، آتا ” اورایا هئچ زامان پنیرقویولمازدی؛ بوپنیرشوبهه لیدیر دیئیب بالاسینین او پنیری یئمه سینه قارشی چیخیر. آما آنانین خوش گؤرولو فلسفه سینه محکوم اولور. بالاجا اوغلان پنیری ییه ر- یئمز اوزانیر و نفسی گئدیب گلمیر. صاباحکی گون اوشاقلارین بیری باشینی چؤله اوزادیب، دلیگین آغزیندا مودئللي، ایری- بوروق بیردمیر پارچاسي گؤروب، اوشاقلارا دوغرو گئری دؤنور: ” آی اوشاقلاربوردا بیرگؤزل دمیر وار گلین اوینایاق؛ اوسته لیک ائوده ده هئچ کیم یوخدور” دئییر. یئنه ده آتا بوش یئره یاخا- واراسینی دیدیر. سؤزو چوخ آما سؤزونون دوزو یوخ. آنا، عاییله نین اونلاری سئودیگندن دولایی، اوشاقلارین اه یلنمه سینه گؤره او دمیری اورایا قویدوقلارینا اینانیرکی اینانیر. اینانمادیغی تکجه شیئی ده آتانین ائو صاحیبیني اؤزلرینه دوشمن گؤرمه سی. اوشاقلار دا آنانین سؤزلرینی آتانینکیندان داها چوخ بیه نیرلر.
بیرینجی اوشاق هوپ دییه دمیرین اوزرینه آتیلیر. آنجاق بیرینجی آتیلیر، ایکیمجییه سیرا چاتمیر. نده نی ده بللی دیر. چونکو بیرینجی آتیلان کیمی تاخیلیب تله ده قالیر. باشقالارینین چابالامالاری دا یئرسیزقالیر. آما، آنا خوش گؤرولو دوشونجه لرینی ساوونماغا داوام ائدیر. اونا گؤره هیچ بیر دوشمنلیک یوخ، بلکه ده حادیثه اوغلانین ياخشي آتیلماماسیندان اورتایا چیخمیشدیر. یوخسا بو اینسانلارین سیچانلاری سئودیکلرینه شوبهه ائتمک اینصافسیزلیق، حاقسیزلیق، وغیراینسانی بیر دوشونجه دیر!
گونلرین بیرینده ائوصاحیبلرینین سفره گئتدیکلری بیر زاماندا اوشاقلارین بیری، ائوده بیر پیشیک اولدوغوندان خبر وئریر. بو خبری ائشیدن آتا هؤنکور هؤنکور آغلاماغا باشلاییر. آنا ایسه اونو هئچ باشا دوشمور. آتا، آرتیق او ائودن کؤچمه لرینین گرکلیگینی سؤیله ییر. “چونکو پیشیکلرین سیچانلارا گؤره موناسیبتلری اینسانلاردان تام فرقلی دیر. اونلار ارثی اولاراق سیچان دوشمنیدیرلر. اینسان راحاتسیز اولماماق اوچون سیچانا قارشیدیر. آما، پیشیک سیچانی یئمه دن ایسته دیگی کیمی یاشایابیلمز. اینسان سیچانی اؤلدوروب آتار. آما پیشیک سیچانی اؤز وارلیغینی داوام اتتدیرمک اوچون قوللانار( ایستیفاده ائدر) ساده دئییم، پیشیک اولان یئرده، بیزیم یئریمیز آنجاق اونون قارنی دیر…”
نه یازیق کی آتانین بوسؤزلری هاوادا قالیر. آنانین، و هابئله آییلماغی سئوميه ن اوشاقلارین قولاقلارینا باتمیرکی باتمیر. جانلارینا یاتمیرکی یاتمیر. آنایا گؤره اونلار ائوصاحیبیندن ایللرجه اؤنجه او ائوده یاشامیشلار. هاراگئده جکلرکی؟! هم ده اینسانلار اونلاری سئودیگیندن، اونلاری اه یلندیرمک اوچون، اونلارا دوست گتیرمیشلر. آنا، اوشاقلاری بویئنی دوست ایله آرخاداشلیغا واویناماغا تشویق ائدیر.
نه باشینيزی آغریدیم؛ پیشیک قارداش گؤزل میومیولاری ایله سیچانلاری بیرر-بیررآلدادیب تورا سالیب، دیشینه چکیر. آما، آناسیچان هرسفرینده بیرحیکایه اویدوروب مسئله نین تصادوف اولدوغونو سؤیله ییر.
بیرگون ارینه “باخ بیزده میومیوایئتسک، پیشیک قارداش بیزی اؤزوندن سایار. اوزامان گؤزلجه سینه بیرآرادا یاشاریق”. آرتیق یئرسیز، و فایداسیز موشاجیره دن یورولموش کیشی آروادینا اویور. دلیکدن چیخیب، مؤو- مؤو چاغیراراق پیشیگه دوغرو گئدیر. توخ پیشیک، قارني آجالانا قدر آتا سیچانی اوینادیر. آجالان کیمی ده فیس فوس ایله، آتانی بالالارینین یانینا گؤندریر. بوماجرانی دلیگین آغزیندان ایزلیه ن آناسیچان یووایا دؤنوب دوشونمگه باشلاییر. سونوندا کیشینین اؤلدورولمه سینین سببینی تاپیر: “ها! تاپدیم؛ کیشی یاخشی مله مه دی. یوخسا پیشیک قارداش بیزلری سئویر. او یازیق نه قدربویاراماز مؤو- مؤو سسینه قاتلاندی؛ آما کیشی بیرتورلو میومیو دئیه نمدی. او دا اوندان حیرصله نیب کیشینی اؤلدوردو”.
آناسیچان بیرنئچه گون بودوشونجه ایله عئينن پیشیک کیمی مله مگه چالیشدی. چالیشمالارین سونوندا، او، پیشیک قارداشدان داها یاخشی مییوو- مییوو ائله ییردی. حاضیرلیغینی حیس ائتدیگی زامان، اؤست- باشینی تمیزله ییب، یوموق گؤزلرینی بیرگؤیه قالدیریب، بیرده بیر درین نفسدن سونرا دلیکدن ائشیگه چیخدی. باجادان دوشموش گون ایشیغینين آلتیندا اوزانان پیشیک اویاندی. آناسیچان آراسی کسیلمه دن مییوو- مییوو ائده رک یانلارینی باساباسا اونا دوغرو ایره لیله دی. پیشیک تعجوبله، اوندان نه دئمک ایسته دیگینی سوردو.
سیچان: ” باخ من آرتیق سیچان دئییلم؛ مییوو- مییوو؛ نه قدرچالیشیب سیزین کیمی پیشیک اولموشام؛ مییوو- مییوو؛ بیزآرتیق بیرآرادا یاشایا بیلریک؛ مییوو- مییوو. دئییلمی؟ مییوو- مییوو”
نئچه گوندور سیچان اتی یئمیه ن پیشیک قارداش قییناغینی قالدیریب سیچانین باشینا بیرقاپباس یئندیردی. ائله بو آندا ائوین قاپیسی آچیلدی. سسدن قورخان پیشیک، سیچانی بوراخیب قاچدی. سیچان دا نه کؤکده اؤلوسونو یووایا سالا بیلدی! اونون اؤزونه گلمه سی بیرنئچه گون چکدی. یئریندن قالخاندان سونرا اؤزونو یالقیزگؤرن سیچان، یاواش یاواش ارینی واوشاقلارینی دوشونمگه باشلادی: “عجبا گئتسم می بوائودن…؟ یوخسا…؟! “
84/5/19 س. داغلی
