ژاپون افسانه‌لریندن
چئویرن: آرغین چاغداش
ژاپونون « مییا جیما » آدلی قوتسال بیر آداسیندا « یوشیدا » و « فومی » آدلاریندا یاشلی بیر قاری ـ قوجا یاشاردی. هر اوچ بالیقچی اوغوللارینین دنیزده بوغولوب اؤلمه‌لریندن سونرا بیر ـ بیرلرینی داها دا چوخ سئومه‌یه باشلامیشدیلار. گونلرین بیر گونو یوشیدا اودون توپلاماق اوچون مئشه‌یه گئدر. یاشلی یوشیدا مئشه‌نین دؤنه‌لرجه دولاشدیغی بللی بیر یئرینده او آنا کیمی هئچ گؤرمه‌دییی بیر آغاج، آغاجین دیبینده ده آخارلی بیر بولاق گؤره‌ر. اییلیب سویوندان ایچر. ایچرکن ده سویا یانسییان و اولدوقجا گنجلشن اوزونو گؤره‌ر. گؤزلرینه اینانماییب بیر داها و بیر داها دا سویا باخار .حتی الینی بیر ده اوزونه چکیب اوزونده‌‌‌کی قیریشیقلیقلاردان هئچ بیر اثر ـ علامت قالمادیغینی آنلایینجا، بو دفعه گئرچکدن ده گنجلشدیینه اینانار. قازاندیغی حالیندن اولدوقجا سئوینه‌ن بو دفعه گنج یوشیدا ایش ـ گوجونو بوراخیب تئز ائوه دؤنر. یول بویو حتی ان یاخین زاماندا قادینینی دا آپاریب او بولاقدان سودان ایچیره‌جه‌یینی ده دوشونر. ائوه گلینجه حیات یولداشی ایلک باخیشدا اونو تانیماسا دا، آنجاق او هر شئیی فومی اوچون آچیقلار. صاباحیسی گونو یاشلی فومی تئز قالخیب تک باشینا بولاغا دوغرو یولا دوشر. آنجاق چوخ گئجیکیب ائوه دؤنمه‌دیییندن حیات یولاداشی یوشیدا تشویشه دوشر. بیر آرا دوشونر. سونرا اؤز ـ اؤزونه « هل ـ هلبت بو قادین بولاغا گئتمیشدیر» دئییب، او دا قالخیب بولاغا دوغرو یوللانار. بولاغا یئتیشدییینده بولاغین باشیندا نئچه آیلیق بیر کؤرپه‌نی گؤره‌ر. سن دئمه یاشلی قادین ایچدیکجه ایچیب، کؤرپه‌لییینه دؤنموشدو. گنج یوشیدا کؤرپه قادینینی به‌له‌ییب کوره‌یینه آلار و بیر عؤمور ارلییینی ائتدییی فومی اوچون عؤمرونون قالان حیصه‌سینی ده آتالیق ائدر.
