Sunday, September 26, 2021
HomeWomenقادينلارين آياق سس‌لري قوشوغوموزون قوتلو آدديملاري / هادي قاراچاي

قادينلارين آياق سس‌لري قوشوغوموزون قوتلو آدديملاري / هادي قاراچاي

Author

Date

Category

دوزونه قالسا گونوموزون قوشوغو اوزه رينه من دئييل، داها ياخيندان ايلگي‌لنن داها ياخيندان تانيش اولان، داها يئتگيلي بيري يازمالي ايدي.

نئيسه، فريباخانيم حياتي‌نين “بير يازي ياز دا نه اولار” دئيه ايچدنليكله دئديينه يوخ گتيرنمه‌ديم. اؤنجه ياييلاجاق قوشوقلارين منه گؤندريلمه‌سيني ايسته‌ديم. اونلاري اوخودوقجا گئرچك‌دن ده منيم دويوب دوشوندويوم بويوتلاري آشميش قوشوغوموزا، اوشاق كيمي سئوينديم.

بو آرادا بو كيچيك نوتو قوشوغوموز اوزه‌رينه دئييل، قادين قوشوغوموز اوزه‌رينه يازيلمالي اولدوغونو دا، قوشوقلاري اوخودوقدان سونرا دويدوم.

 

 

قادينيميز هانسي قونومدادير؟ چاغداش يازينيميزدا ياراديجي قادينيميزين دورومو نئجه‌دير؟ گنجعلي مهستي‌دن، مهسا مئهديلي يه كئچن يولون اوجو، بوروق‌لاري، تين‌لري هارالاردادير؟ سورولاري داها دا دقيق‌لشديرمك، داها دا كونكريت‌لشديرمك اولار. آيالاما درگيسي ائله بئله اولاناق اوستو بير سئچيمله قادينلارا گيريشدي‌مي يوخسا گونئيين ياراديجي يازين‌ينين آپاريجي، ياراديجي گوجونون، قادينلار اولماديغيني دوشونن بيزلر يانيليرميشيق؟

قوشوق‌لاري اوخودوقجا اؤزومون ايلكين گؤروشومه اولان قوشوقلاريم يالنيز مني دئييل، بيلگي‌ساياريمدان سيزاراق بوتون اوتاغيمي بورومه‌يه باشلادي. آرادا سئيد حئيدر بيات‌لا آيدين آرازين چوخ درين، سئويملي آككوردلاريني گؤرمزدن گلسك، آيالاما درگيسي گونوموزون قوشوغون‌دا قادينلاريميزين چوخ جيددي بير گوج اولدوغونو سرگيله‌ميش دوروم‌دادير. بونون‌لا دا يئنيدن آياقلانان آيالاماني قوتلاسام گرك.

بير نئچه يئدديجه(هفته) اؤنجه سئوگيلي فريباخانيم حياتي فئيس‌بوكدان منه كيچيك بير ايله‌تي وئردي:”هادي بئي، اولورسا بيز بو “آيالاما”ني يئنيدن ايشلمك ايستيريك”. من ده دوغال اولاراق “نييه ده اولماسين!” دئيه يانيتلاديم. فريباخانيم باشقا خانيم يازيچيلاريميز، قوشوق‌چولاريميز كيمي گئنج قوشاغيميزين ائنرژيك اؤرنكلريندن بيريدير. اونون دا ياراديچيليغيني اينترنتدن ايزله‌ييرم.

اوزون زامان اولدو قوشوغوموزو يالنيز بيلگي‌سايار آرخاسيندان ايزله‌يه‌لي. آيالامانين بو ساييسين‌دا گلن قوشوقلارين، قوشوقچولارين هاميسيني سانال اليشگيلردن تانييرام. بير سيراسي‌يلا تئلئفون گؤروشمه‌له‌ريم ده اولوبدور. ياخيندان گؤروشمه‌دييميزه باخماياراق بو گونوموزون ان ياخين اينسانلاري كيمي ايچيمده ياشايانلاري دا وار. بوتون بونلاري، بو شخصي، پيريوات كونتئكس‌لري نه اوچون سؤيله‌ديم بيليرميسينيز؟ بونلار منيم گؤره‌نمه‌دييم قوشاغين سسلريديرلر، دئمك ايسته ديم. بونلار سون 10-15ايلين قيزيل بوداقلاري‌ديرلار بيلديرمك ايسته ديم. بونلار بيزيم گئنجلييميزديرلر، بونلار چوخونلوقدا قادينلارديرلار. بيزيم سئويملي، ياراديجي قادنيلاريميز.

ايشين ان سئوينديريجي يؤنله‌رين‌دن بيري ده آذربايجانيميزدا تورك قادينينين تورك قوشوغوندا چوخ جيددي، چوخ ائتگن قونوما مين‌مه‌سيدير. اوخوياجاغينيز قوشوقلاردا روقيه خانيم كبيري سيزه بير يول چيزگيسي چيزه‌جكدير بو يول بير ناويقاسييون‌دور. بو يول داها اؤنجه وئردييم آنا سورونون يانيتي‌دير. گنجعلي مهستي‌دن آيالامانين بو ساييسي‌ندا آدلاري بئله چكيلمه ميش ائلناز ايسلامونده، زيبا كرباسي‌يه، نيگار خياوي‌يه گئدن يولون خريطه سي نئجه اولار؟

من، قوشوق‌چولاري بير بير يئني‌دن اوخوتدورماق ايسته‌ميرم. قوشوق‌لاريني اوخوياجاق‌سينيز، گؤروشونوزو پايلاشماني اونوتمايين. بورادا آدي چكيلمه‌ميش بير چوخ سئوگيلي قوشوق‌چولاريميز داها وار. اونلارين يئرلرينين بوش اولماسي سيزي سيخماسين. آيالاما گلن ساييلاريندا كسين اونلاري آختاريب تاپاجاقدير.

اؤز آديما بو ساييدا اوخودوغوم قوشوقلاردان گئرچكدن سئويندييمي بير يول داها بيلديره‌رك، آيالامانين بو ساييسين‌دا امه‌يي كئچنلره اللرينيز آغريماسين دئمه يي‌ ده اونوتمورام.

ياشاسين تورك قادين يازيني، ياشاسين گونئيين باجاريقلي خانيملاري، ياشاسين ديليميز، يازينيميز، ادبياتيميز!

 

هادي قاراچاي

 

LEAVE A REPLY

Please enter your comment!
Please enter your name here

Recent posts

Recent comments